Nadèl - Battista Rompianesi

Nadèl

I m'àn détt che stanòt
l'è nê al nòster Bambèin
e me al vói propia
guardèrel d'avsèin.

Mo guèrda che raza
ed miséria ch'al gh'à !
l'è nê in d'na stala
e brisa in d'na cà !

Oh, povr'al mê Sgnór
le dèintr'in cla stala,
fra un bóo e un sumèr
in mèz a un po' d' paia !

A vré gnir't in aiut
purtàndet di stàch
e fèr't un po' d' fógh
per difàndret dal fràd!

Mo quàst an pos fèr
perchè a sun piculèin,
e alora at prumàt
ed dir sèimpr'al mê bèin,

d'ubdir a la mama
e anch al papà,
d'vlér bèin ai fradée
e al surèl ch'a gh'ò a cà.

L'è quàst, an n'ée véra,
al chèld che Tè t'vóo
da qui ch'i èin al mànd
al gióren d'incóo?!

E ch'is vléssen tótt bèin
cum'as vlàm in famìa;
tó, ciàpa un basèin,
ch'a dév andèr via!