Sproloquio 2001

SANDRONE - Mudnés éd Mòdna, mudnés ch'a-i-avî scavalchê al sécol vèc' e a sî arivê in dal “ventunesimo secolo”, Zemiàn clonê e Zemiàn ch'a sî sèimper méno dòc, zitadèin ariós cun e sèinza permàss éd sogióren, automobilésta cun e sèinza marmétta catalizèda, a-v salùt tótt quant in masa. Mo' che bèla nuvitê, a sàm arivê in ritèrd anch st'an. Un po' per via dal tràfich e un po' perchè, quand a sun arivê in Staziòun dal Bòsch éd Satta, a-n mé catèva piò. Quàlla lè la-n pèr ménga Â?na staziòun. Per i bigliàtt a gh è da fèr a cazòt e in séla d'aspèt, cóme minìm, a gh vól la guèrdia dal còrp. E po', tótt chi búrtel a ródi pèr aria… S'pól-n-i ménga ricoverèr in un depòsit cóme Dio vól? E cal brótt bancàtt pèr i lébber?

SGORGHIGUELO - Popà, bèda ch'l'è provisòri.

SANDRONE - Sè, provisòri! Ma da soquànt an? Quand l'è stê pussìbil, a-s sàm aviê per córs Vitòri. A m'è gnû al sangiótt. Pèr risòlver al problèma di stóren, i han pudê i élber. I han fat cóme qui che, cun l'aqua spòrca, i han cazê via anch al ragazól. Adèsa, di usê scagazòun a-n gh n'è piò, ma a-n gh è piò gnanch èl bròchi dél pianti. Ogni zinch minùt, però, a-s sèint listàss un zigh mecànich ch'al duvrévv spavintèr i stóren, invéci al fa gnir i sgrisór a chi pasa per la strèda. Comunque, mudnés, stê sò éd morèl, perchè l'è teimp d'eleziòun e la situaziòun la pól sól.

SGORGHIGUELO - Andèr péz.

SANDRONE - Tès, barbaiòch. La zitê la srà tótta arnuvèda, perchè qui dla Cumùna i déven fèr bèla figùra. I m'han détt che al séndech al gh ha intenziòun, finalmèint, éd turnèr a fèr tótt i merciapê éd largo Garibaldi.

SGORGHIGUELO ¬ A srévv anch óra, perché a gh è dél busi che, quand a pióv, a-t arìva di sciatèin ch'i pèren qui dla Jacuzzi che la mama l'ha vlû per Nadèl.

SANDRONE - E po' al farà nóva tótta l'iluminaziòun éd via Giardini, in dóve adèsa a-n s'vadd un òrba gàzza. I progràma i én tant. Però, quèlch sugerimèint a Giuliano a gh al vói dèr listàss. Decìdet mo' �na bòuna vòlta a risòlver al problèma di parcàgg' in cèinter. I ministradór dla Cumùna i prumàtten, i prumàtten, ma éd concrét a-n s'vadd mai gnint. Sól che i pòst per él màchini al cinema Adriano e a l'Odeon, qui avsèin a la staziòun e qui sàtta i viê dal Parco i-n sparéssen cóme chi pòst éd lavór ch'i gh fan publicitê a destra e a sinistra, ma a-n sé sa ménga in dóve i sìen andê a finìr. A-n s'capéss ménga cóme mai in un paés in dóve la disocupaziòun la dà tant pensér, adèsa tótt i zérchen di operai e di impieghê.

SGORGHIGUELO - Mè a-m mé fagh ménga catèr.

SANDRONE - Comunque, lasàmla lè, perché cum'al giva cal mê amìgh: “Piò la-s màsda e piò la pózza”. Ministradór, decidìv a fèr un parcàgg' sàtta piaza Mateòti, cum'a gh'è a Pèrma sàtta la Pilotta e a Bulègna sàtta a piaza Ot d'Agàst Tant per quall ch'la sérv piaza Mateòti!. L'è dvintèda péz dla màsa drê da cà nòstra. Alóra, piotòst che cla tànda in dóve i fan tótta cla gatèra fin a tèrd, che qui chi stan lè éd cà i-s lamèinten, a srévv méi ch'i purtéssen lè al circo Togni. Alméno, a gh srévv di paiàz piò seri. Insàmma, bisàgna che la zitê la faga tulàtta.

SGORGHIGUELO - C'sa vó-t dir, ch'i faràn di cèso nóv

SANDRONE - C's'è-t capî ignorànt? Comunque, a gh vól anch éd qui lè. Oramài per spàndèr aqua in un bar dal cèinter, oltre a urdnèr un cafè o un bicér d'aqua minerèl a gh vól la chèrta d'identitê. Un bisègn impruvìs al càsta piò che fèr claziòun. E po', quand té dmand la cèva, i barésta i-t fan i raz cóme sé pissèr a fóssa un pchê. Ministradòr, dèv �na mòsa, perchè s'l'è véra ch'a-i-avî inpruméss éd gnir incòuntra ai bisègn di mudnés, badê che a fèri i vìnen tótt in piaza Granda

SGORGHIGUELO ¬ Ve', popà, turàn-i di autobus ancàrra piò langh?

SANDRONE ¬ L'è impusìbil. Di autobus fóra tàia a-n gh n'è piò. I han cumprê tótt qui dl'Azienda. Al probléma l'è ch'i gh strécchen e in via Farini i s'incàstren. Giuliano, próva a regalèr a Galerani, l'ascensór al tràfich, un méter e un cumpàss per tór méi él misùri dél vultèd! Comunque, a-n vé dèdi pensér. Acsè langh i pólen sèimper servìr per bluchèr al tràfich al giuvidè éd evitèr l'inquinamèint. Bàsta piazèren un a San Làzer e un a la Madunèina.

SGORGHIGUELO - E po', Zemiàn, avìdi un po' éd pazìnzia. Pensê che fadìga i han fat i mericàn per fér un “bus” sól

PULONIA - Vuèter dû a sî propia dô bacchi santi, a-n vé va bèin pròpia gnint in sta bèla zitê. Pensê che adèsa a gh avàm anch él cadàtti

SGORGHIGUELO ¬ Mama, a-m piasrévv andèrgh ambrós, ma acsè in divisa é-m màtten in sudiziòun. A gh è al perìcol che a fèregh di simitòun é-t dàghen �na stmana éd cela éd rigór.

PULONIA ¬ Tè fa a mód, ch'a-n sucéd gnint. �-t vést, piotòst, tótta cla cagnèra adrê al Grande Fratello? Cristina, la biundèina ch'l'ha vint, la parìva ch'la féssa, ch'la féssa, e, invéci, quàlla ch'la s'è fata fotografèr nuda nèda l'è stèda cla brèsa smòrza éd Marina.

SANDRONE ¬ Smàttla mo éd parlèr éd cla zanglèda lè. I s'han fat vàdder per di més di ucaròt chi magnèven, chi bvìven, chi cantèven.

SGORGHIGUELO ¬ Chi fèven

PULONIA ¬ Tès spurcaciòun, che mè a-t sèr per trî més in clumbèra, ma da per tè

SANDRONE - Insàmma, i fèven éd tótt méno che lavurèr. E po' i han ciapê anch �na móccia éd sòld. St'ètra vòlta, al Grande Fratello a t'iscrévv anca tè. Cus'a gh vól, la laura? In fat d'ignorànza, tra tè e lór a gh srà al fil dla pulèinta. L'ùnich problema l'è che té-n cat un èter Taricone

SGORGHIGUELO - Cal ghignós!

PULONIA - Tès, invidiós!

SGORGHIGUELO - A vrà dir che prémma éd mandèr la dmanda a qui éd la tivi, invéci d'andèr a sghèr al fèin in campagna, a vagh in palestra a fèr al budi-bolding e per alenèrem a stagh srê per un més in fila in dla tésa.

SANDRONE ¬ Mè, un cóme Taricone, dô spali rubèdi a l'agricoltùra, al mandarèvv a fèr so la masa.

SGORGHIGUELO ¬ Ve', pòs-i-a dir la mia a propòsit éd la zitê nóva che i nòster ministradór i-s vólen regalèr? Oramai a Mòdna, fra la mérda di pizòun e quàlla di can, bisàgna fèr al slalom gigànt sui merciapê. Perchè al Dìuren in piaza Mazini i-n gh fan un cèso pùbblich per i can? La-n srévv ménga �na brótta idea. Pchê che i can i-n gh àven dirétt al vót, senò i l'avrévven bèle fat!. Piotòst, è-t sintî che i leòun dal Dòm i én dvintê vérd da la ràbia perchè i-n n'i puléssen piò? L'èt'r an i han dê la cólpa a di bòun da gninta chi avìven scambiê la nòstra bèla césa per un pisadór, ma stavòlta, invéci, per San Silvèster, cun i Nomadi in piaza Ramma a-n n'è sucès gnint éd mèl

SANDRONE - I nomadi in piaza Ramma? Perchè a-n gh è piò pòst in via Baceliera? E a propòsit éd pòst, ve', a-m vin in mèint la Posta. la Posta éd via Emilia. La fa gnir gòmit dèinter e fóra. Fóra l'è ardótta ch'la fa pèina e dèinter... péz. Mudnés, a-v dagh un cunsélli. S'a vlî che i avgórri i arìven puntuê, qui éd Nadèl mandèi pèr Pasqua e qui éd Pasqua mandèi pèr Nadèl. Magari, aspetê fin a San Stéven. Comunque, a-n n'è ménga l'ùnich ufézzi statèl méss mèl. Sî-v mai andê a la Motorizaziòun? A gh è dél fili ch'él tàchen fóra da la pòrta e bisàgna tór al nómmer cóme a la Coop o al Poliambulatori in dóve i chèven al sànghev. I disen ch'i én “in sotto organico”. E alóra? Tulî i impieghê in dóve i gh cràssen. Ad esèimpi, a la Biblioteca Estense, dóve per zerchèr di lébber a gh è un esércit d'impieghê ch'a sàmbra d'éser al Sèst Campèl. San-i mènga che adèsa a gh è al computèr e Internèt?

SGORGHIGUELO - A propòsit d'Internèt, popà, a vói dir a tótti chél bèli ragazóli ch'él s'ascólten che pèr mè a-i-ho avért un sit ch'al s'ciàma www.Sgorghi.Boscodisotto.com. Tè, invéci, pèr fèr un ripàs, a t'ho iscrétt “alle lezioni di sesso” ch'i fan su www.Stradanove.net

SANDRONE - Bèda ai tô interèsi, che ai mê a gh pèins mè. A propòsit d'interèsi, i-v sintî? Vést che la Banca Popolèr dl'Emilia Romagna l'ha cumprê al Banch éd Sardègna, i m'han détt che adèsa i interèsi dal còunt corèint i s'i pèghen in tanti fòrmi éd pecorino. Almeno, speràm ch'i i pèghen, mènga cóme qui chi han sferghê al pòver Pavaròti, che in piaza d'�rem l'è gnû tanti vòlt a cantèr pèr beneficèinza.

PULONIA - A-m fè-v dir quèl anch a mè a propòsit éd Luciano? A sun cuntèinta che lò e Nicoletta i fìlen “in perfetto amore”, ma a-m piasrévv che lê la gh déssa un bòun cunsélli. Vést ch'al s'fa sgurèr tant sòld dal tas e al n'ha dê un vagòun a l'Adua, la pròsima vòlta, Â?na pèrt dl'incàs dal conzért ch'al la dàga per la nóva séd dla Rosini. Intànt, l'è ónna dél societê centenàri éd Mòdna e po' l'è la corèl in dóve sô pèder Fernando, per tant an, l'è stê un di miór curésta e lò l'ha imparê a cantèr acsè bèin.

SANDRONE - Brèva, �na volta tant a sun d'acòrd tégh. Piotòst, a vrévv savér dai ministradór che fin l'ha fat al cafè ch'al dév avrìr chè satta al pòrdegh. A in parlàm tótt i an, ma a-n s'vadd ancàrra gnint. Cum'é-la? A-n vrévv ménga che cla concesiòun lè la fóssa stèda mandèda via per posta.

SGORGHIGUELO - No, pèr vrir i véren, ma qui chi han vint l'apélt i én di mesicàn e al pòst dal lambrósch i-s daràn da bàvver dla techìla. Sicùra che pèr sferghèr él nòstri coperatìvi a gh vlìva pròpia sól di mesicàn... E a propòsit éd coperatìvi, savì-v che, tra Casnèlb e Furmézzen, a gh è Â?na butéga éd fruta e verdùra ch'la-s ciamèva “Il cocomero” e ch'la stèva pèr andèr in scartòz? Bèin: adèsa la-s ciàma Ipercoc e la va da Dio...

SANDRONE - A-n dir dél caiunèdi. Piotòst i m'han détt che al cavalcavia éd Ciro Menòti i al ciamaràn Cima Maserati e in zémma, per i ciclésta piò lòfi, i gh mitràn un distributòr d'osìgen. Chi pasarà per prémm lè sóvra e anch sul cavalcavìa éd la Madunèina al vinzrà al Gran Prémi dla muntàgna. Al prémm pòst in clasìfica al darà la posibilitê éd girèr al giuvidè anch sèinza la marmétta catalizèda. Un bèl lavór anch qual lè: al sérv cóme casca e po' blésga...

SGORGHIGUELO - Sól ch'i-n fàghen cóme cun l'èlta velocitê, ch'l'è acsè èlta e acsè veloce ch'la-s dév ancàrra vàdder

PULONIA - Vuèter dû a parlê sól da amm. E a chél pòvri dann ch'él déven andèr a fèr la spésa, a-n gh pensê menga? L'ètra stmana, a sun gnùda a Mòdna pèr vàdder s'a gh éra quèl in liquidaziòun éd taia un po' budànta. Mo' a-m sun pérsa!.. A vlìva tór un filìbus per gnir in cèinter da la staziòun, ma a-i-ho vést sól al nómmer trî ch'al va a Montfiurèin, al nómmer quàter ch'al va a Belària, al nómmer sê ch'al va a Forlì e, adiritùra, Â?na curéra ch'la va a l'aeropòrt. Alóra a sun gnùda a óngia fin sàtta al Pòrdegh dal Colég' per andèr a la Standa. A-i-ho fat apèina in tèimp, perchè adèsa, in cèinter, i han srê anch cla butèga lè... Ã?nna adrê cl'ètra: Scaltriti, Maria Vittoria, él librerìi éd Panèin, Lord, Galèria tessùti e pèr finìr anch la Standa. A pèr cum'a quand in campàgna a vin la murìa in dél galèini. E s'in gi-v éd tótta la roba ch'la crass, nonostànt i ministradór éd Ramma i dégghen: “tutto va bene madama la marchesa”? A crass incòsa: l'aqua, la lus, al gas, al rósch, la tivi, l'autostrèda, al treno, al teléfon, l'Ici, per a-n dir dla benzìna ch'la dà i nómmer cóme al zógh dal lòt. E adèsa él gafi él cràssen anch él multi. Per fòrza. I li han dvùdi màtter in riga cun l'inflaziòun. Comunque, per la féra éd Sant Antànni, égli han fat un bèl arìv: su i diviét éd sosta égli han scambiê al protetór di Zemiàn cun quall dél bésti. E per tgnirla cùrta, dànn, s'a vlî spànder méno, a-v dagh un cunsélli: paghê in euro, acsè a imparê a cuntèr cun la munéda nóva e, almeno, a-v sembrarà éd spànder la metê

SANDRONE - A-n parlàmma éd sòld, ch'a-m vin i sgrisór làngh al filòun dla vétta. In campagna la va sèimper péz. Epùre, i cuntìnuen a batzèr di partî nóv cun di namm lighê a la tèra. Adèsa, dòp al garòfen, la quérza e l'uliv, l'è la vòlta dla margarétta e dal girasól. Ma s'i-s'guardéssen in dal spèc' e alméno un di nóv, i polìtich i al ciaméssen “partito delle facce di bronzo”. Sè-t quant iscrétt

SGORGHIGUELO - L'è cóme cla nóva fèsta ch'i han importê da l'America, Halò Vèin, ossìa al dè ch'a vin fóra �na móccia éd zócchi. Ma in parlamèint, alóra, Halò Vèin i l'han sèimper festegèda sèinza fèrsel savér

SANDRONE ¬ Eh, ma tótti él veritê, Sgurghéghel, é-n stan ménga sèimper bèin détti!

SGORGHIGUELO - Ve', popà, mèinter a navighèva in Internèt a-i-ho lèt che adèsa per nuèter mas'c' a gh è al “pillolo del giorno dopo”. In tóggh-i-a in farmacia un pòch per mè? Per tè no, perché a gh vrévv Â?na pillola da tór sê més prémma...

SANDRONE - Gabiàn, ai mê tèimp l'unica pillola ch'a tulìva l'éra �na Golia pèr tirèr méi al fiê. Tè, invéci, anzichè pensèregh al dè dòp, pèinsegh al dè prémma, ch'l'è méi. Piotòst, lasèm finìr al descórs dla campagna, ch'la pèr ch'la-m pàsa e po' la va sèimpr péz. A gh manchèva sól la mucca pazza. A-i-éra preocupê e a la mê Gigia a gh ho fat fèr �na visita éd contròl. La-n n'è ménga mata, i gh han catê sól un pòch éd sistema nervós. Adèsa, però, per via éd tótti él protèsti in gir per l'Italia, qui di Cobas dla chèrna e dal lat i l'han vlùda cóme controfigura dl'Ercolina. E la Gigia i m'l'han nolegèda a desmélla franch al dè. Sól ch'l'è sèimper in trasférta. E adès, un pòch per al strèss e un pòch perché la s'è muntèda la testa per via ch'l'è sèimper in tivi, la-n mé fa piò lat. Po' a sun preocupê per via éd tótti stél lég' comunitari nóvi. La sfóia i la fan anch sèinza i óv, la cecolèta sèinza al cacao, l'asê balsàmich i al làsen fèr anch a Napoli e i zampòun a Belluno. A-n gh è piò religiòun.

PULONIA - A gh cala sól che adèsa i làsen fèr i turtlèin sèinza al pést!

SANDRONE - L'ùltma, però, la li bat tótti. A-i-ho lèt in dal fói che adèsa i vólen fèr anch al lambrósch transgenico. Che mè, po', a-n so gnanch s'a-s vóia dir. A-n gh calarévv èter. L'óvva la vól ancàrra sgualzìda cun i pê.

SGORGHIGUELO - Popà, dagh mo' un tai, ch'l'è un'óra ch'ét ciacàr. Adèsa a vói parlèr mè a tótt i sportìv mudnés che finalmèint i gh han mutìv d'éser cuntèint pér cóme égli én andèdi él còsi in cà dla Ferari e él stan andànd in cà dal Mòdna. Tifós éd la Mec Larèn: “Tremate tremate, le rosse son tornate”. Scumakèr l'è campiòun dal mand e i l'han fat zemiàn onoràri. Luca di Monteprezzemolo l'ha détt che st'an a gh àm Â?na machina ancàrra piò tògo per fèr al bis. Tòt, al diretór éd Maranèl ch'al pèr Topo Gigio, l'ha détt ch'al resta chè. A sàm in Â?na batta éd fèr. Pér al Mòdna a vói dir che s'a sbaglia De Biasi a sbaglia tótta la mlunèra. A sàm prémm in clasìfica e la promoziòun in B la-n pól manchèr. A sun cuntèint anch per Gigi Muntagnàn che da lassò, sóvra Â?na nóvla fata a tribuna, tótti él dmanghi a-s tós él sô sudisfaziòun. E po' a vói fèr i avgórri a Bertolotti, ch'l'ha ris'cê la vétta per Â?na carugnèda vigliàca d'un zugadór che per furtùna l'éra sô amìgh e l'aviva apèina vint la partìda... S'i-n s'fóssen ménga cgnusû e l'avéssa pérs, c'sa gh fèv-el? Gh sparèv-el?

SANDRONE - T'è parlê cóme un lébber stampê. Mo' c'sa fè-t? Frequèint-et éd nascòst i córs del Cepu cóme Papi e Del Piero? Comunque, mudnés, da sté balcòun, a vói dir che per la prémma volta in tant an, st'an, l'òt éd diciàmber, in ucasiòun dla fèsta dla Madànna, chè sóvra, óltre al Vàschev, a gh éra Â?na masa éd gèint. A-n vrévv che d'ora in avanti a gh vléssa l'agenda per prenotèrel, perchè sté balcòun chè, arcurdèvel, i ministradór dla Cumùna “in comodato gratuìto”, cóme i dìsen qui chi san éd làttra, i m-l'han dê a mè! E adès, prémma éd salutèrev, a vlìva parlèr ancàrra un pòch di problema dla nòstra bèla zitê, ch'i én po' séimper i stàss. Adèsa i vólen tirèr via él botèghi oscuri éd piaza Venti, ma mè a dmand: i-n gh psìven pensèr prémma éd fèr-l-i fèr a un architàt éd ghégna?

SGORGHIGUELO ¬ S'a al gh l'avìva, la ghégna, adèsa al l'ha pérsa!

SANDRONE ¬ E i-v vést cus'i han fat cun al cavalcavìa dla Nonantolàna? Un mazèl. Adèsa a gh è da fèr ancàrra qui dla Vignolèse e dla via Emilia. Alóra, a vói dèr un cunsélli a Barbolini e a Galerani. Per fèr un progèt cum'a-s dév, già ch'a gh sàm, famm fèr un cuncórs a soquànt caruzèr! Tant, finora, i piò dirèt interesê a la viabilitê dal cavalcavìa dla Nonantolàna i én stê pròpia lór. E dal Pian dal tràfich d'Huslèr c'sa gh è armès? Adèsa, a pèrt i viê dal parco, in dóve a parchèger a-n sé sa ménga s'a sia piò custós o pericolós, i fan tótt a l'arvérsa éd prémma. Ciro Menòti, vièl Reiter e vièl Fabrézzi i turnaràn a dàppi séns éd mèrcia. Vést che fèr e desfèr l'è tótt un lavurèr, perchè, già ch'a gh sî, a-n turnê a màtter cóme prémma i viê dal parco? Ciovè, �na circonvalaziòun naturèla, cóme quàlla éd Bulègna ch'i s'invidièven tótt. E per finir, sòl dô paròli a propòsit èd Gerry. A-m'in despiès, ma al séndech cla pòrta lè i gh l'han pròpia srèda in dla ghégna...

SGORGHIGUELO - E adèsa, alóra, per andèr a lavurèr cuma fa-l? Va-l dèinter in dla Cumùna per la fnèstra?

SANDRONE - Tès, galbéder, ch'a pérd al fil dal descórs. Un po' a la volta, al progèt inizièl éd Gerry, dô bèli gru ch'èl srévven servìdi anch pèr fèr al sbagài dl'usdèl éd Sant Agustèin, per via dla bulàtta al s'éra ardótt a pòch e gnint. Cun i sòld ch'i gh ìven méss a dispusiziòun, sè e no, Gerry al psiva fèr �na tarr èlta cóme la funtàna dla Béssa. Méi acsè. Giuliano, vó-t un cunsélli? A Gerry, ch l'è un gran architàt, fagh fèr al museo dl'automòbil sportiva. Ferari, Maserati, De Tomaso, Stanguelini, Bugati, Lamborghini: cla ròba lè a gh l'avàm sól nuèter in tótt al mand. Al dvintarévv un atraziòun internazionèl. A visitèrel insàm a la cà in dóve l'è nê Ferari, ch'la dvintarà prèst un museo, cum'a v'avìva sugerî al fói dû an fa, i gnarévven da tótt al mand.

PULONIA - Ragazô e ragazóli a-n vé desminghèdi éd gnir dmànga matèina in piaza Granda quand Sandròun l'incuntrarà tótti él scól e dmànga dòp pranz a la Mascherina d'oro, che cóme tótt i an la Societê dal Sandròun l'organézza al Teàter éd Santa Agnese. E po', mudnés, mè, mê marî e mê fiól, sàbet e dmànga, a gnaràm in cèinter in mèz a vuèter a fèr dél ciàcri in dialàtt, a fèr dû pas sàtta al Pòrdegh dal Colég', per stèrev piò avsèin e anch cgnàssrev méi...

SGORGHIGUELO - Cum'a giva quall: “Portateci i vostri bisogni su una carta” e nuèter a i purtaràm in Cumùna.

PULONIA - T'è sèimper al sòlit melnàtt. Piotòst, ragazóli arcurdèv anch éd gnir martedè, ultma sira éd Carnevèl, al Gran Vegliòun mascherê organizê da la Societê dal Sandròun al Mac 2. Gnî tótti in custóm

SGORGHIGUELO - E anch sèinza

SANDRONE - Piàntla, Sgurghéghel! E ora, prémma dal salùt finèl, a gh ho da fèr Â?na lamentéla a la Societê dal Sandròun, ch'l'organézza al mê arìv in zitê. Sé, perchè, st'ètr'an, in di manifèst murê chi anùncen l'ora dl'arìv dal Bòsch éd Satta, “mi consenta”, a gh vói anch la mê foto a culór. E bèla granda, a m'arcmànd. E adèsa l'è pròpia gnû al mumèint di salùt. Mudnés, magnê, bvî e stê in salùt. E stê ancàrra de piò atachê a cla piòpa, èlta e slanzèda, piantèda in dl'umbréghel éd Mòdna, ch'la s'ciàma Ghirlandèina